Bruxelles, 11 Mata 2003

 

 

FROM : Massaihouse@hotmailcom

TO : Israël Ntaganzwa <rugamba@juno.com>

SUBJECT : Re [rwanda-l] Kuli Ntaganzwa : Kigeri V Ndahindurwa, Umwami wa Rubanda.

 

 

 

 

 

Dusubize Bwana Israël NTAGANZWA

 

Baciye umugani mu Kinyarwanda ngo : « Abatajya i Bwami babeshywa byinci ». Koko rero ndabibonye, dore hali abamaze
kwiha kubeshya ngo baravuga iby’i Bwami n’Abami. Uravuga ngo Kigeri V Ndahindurwa ni Umwami wimitswe
Abanyarwanda
, ngo yambaye ikamba, ngo bamuha mandat yo kuyobora u Rwanda… Urongera uvuga iby’imivireho ye,
 ko Abazungu baba barabigizemo uruhare.

 

Aha rero ndagira ngo nkubwire ibintu bitatu by’ingenzi byerekeye Ubwami bwa Jean-Baptiste Ndahindurwa :

 

1. Uretse na Ndahindurwa uwo, na se Musinga, Yuhi wa V, ntiyimitswe ku bulyo bukulikije amategeko cyangwa imihango w’Ubwiru. Niba uzi amateka y’igihugu cyawe, uzi ko Umwami Kigeri IV Rwabugiri yasize atanze ali Rutarindwa. Uyu
Rutarindwa arima mu izina lya Mibambwe IV amara umwaka ku ngoma, nyuma Abega baza kumuhilika bimika mwishywa
 wabo Musinga. Abiru barumirwa, barushwa amaboko barabyihorera. N’ikimenyimenyi hali imihango yagombaga gukorerwa Umwami buli gitondo (kuramutsa Kalinga), Abiru barabimubuza (mbese nk’uwabuza Président kugera imbere y’Ibendera
 ly’igihugu ubwo uwo aba yambuwe ububasha mu gihugu bwo kuba Président).

 

Abazungu bavanye Yuhi IV Musinga ku ngoma, bamusimbuza umuhungu we Charles-Léon-Pierre Rudahigwa, yima mu izina
 lya Mutara wa III. Icyo gihe Abapadiri bamubuza gukorerwa imihango yo kwimikwa nk’uko iteganywa mu Bwiru. Bukeye aranabatizwa, ingoma ze zilimo Kalinga azitura « Kristu-Umwami ». Ubwo iby’Ubwiru biba bisezerewe burundu.

 

Rudahigwa yamaze imyaka 28 ku ngoma. Nta mwana yasize. Kuba yali yaravuze ko azasimburwa na Jean-Baptiste
Ndahindurwa, ni ikosa likomeye, kuko nta mwami uraga ingoma undi muntu utali umwana we. Ibi mvuze nagira ngo
nkwereke aho bivugwa mu Bwiru. Uzi neza ko Padiri Alexis Kagame yali yarahawe Ubwiru; mu nyandiko ye yatangaje mu kanyamakuru (revue) kitwa « Aequatoria, n°2 » ko muli 1945; soma rero ibi yanditse :

 

« Le Ruanda est gouverné, depuis trente générations, par surcroît, se sont succédés de père en fils. Le « Code Esotérique »
 de la Dynastie (dont les dix-huit poèmes ne furent révélés pour la première fois qu’en 1945)
s’oppose absolument à
toute intronisation d’un prince qui ne soit fils du régnant.
Ceci exclut a priori l’intronisation des cousins, coutume en
cours dans les royaumes du Protectorat de l’Uganda. Bien plus, parmi les fils du régnant, il n’y a qu’un seul prince né Roi, prédestiné à cette dignité par Dieu. Si ce prince pouvait mourir sans rejeton,
dans le cadre de ces prescriptions du Code Esotérique, la Dynastie serait éteinte, bien que le défunt laisse d’innombrables frères. Il n’y a qu’un roi par génération ou, en d’autres mots, un Roi ne peut engendrer qu’un seul Roi.

 

Ces principes en soi rigides, cependant, s’accompagnent de correctifs très judicieux, qu’il serait trop long d’aborder ici.
Il peut se faire, par exemple, qu’à la mort du Roi, son successeur ne soit pas connu de tous ses sujets, et qu’il ait une
guerre de compétition au trône. Comme la royauté est une dignité au-dessus des forces humaines, il n’y a que Dieu qui
puisse trancher le différend. Comment plaider devant Dieu ? On doit plaider « par les arcs » : c’est-à-dire que les
prétendants sont obligés de se battre. Et à quel signe reconnaîtra-t-on la sentence de Dieu ? Par la victoire qu’il accordera
 au prince prédestiné à la dignité royale. Le Roi est, du reste, appelé « un dieu », ou « l’œil par lequel Dieu regarde le Rwanda
 ».

 

Aha rero harakwereka ko Musinga atali Umwami, kuko atarazwe na se Kigeri IV Rwabugiri (Sezisoni), ibyo kurwanira ingoma usomye muli iyo nyandiko, byakorwaga nta mwana b’Umwami urima. Naho Rutarindwa yarimye, avugirwa n’ingoma umwaka urashira. Kandi barwaniraga ingoma igihe se yatangaga nta we asize avuze. Wumvise rero ko n’ubwo Rudahigwa atarazwe ingoma na se, byibura yabaye umwami iyo myaka yose. Nta wundi Mwami washoboraga kuva mu nda ya Musinga ; kuko Umwami abyara umwami umwe gusa (nk’uko ubisomye).

 

2. Jean-Baptiste Ndahindurwa ntiyimitswe n’igihugu, yavuzwe na Rukeba, utali Umwiru, avuga ko yabibwiwe na Musinga
igihe yali i Kongo (ngo yagiye kumusura arabimwongorera). Ni ikinyoma gikabije kuko mbere y’urupfu rwa Musinga muli 1945,
ntiyali azi ko umuhungu we mukuru Mutara III Rudahigwa atazabyara ! Ikindi kerekana ko ari ibinyoma bya Rukeba amaruwa
 abiri Padiri Alexis Kagame yandikiye Mgr Perraudin, imwe 27/07/1959 n’indi 30/07/1959, ahamya neza ko ali Mutara III Rudahigwa wavuze ko Ndahindurwa aliwe uzamusimbura. Ibyo yaba yarabimubwiye muli « Hôtel Bougainvillées » i Cyangugu. Yanabibwiye Umwiru Alexandre Kayumba, aliko igihe cyo kubivugira muruhame Padiri Alexis Kagame yigira nyoni-nyinshi ko ntabyo azi. Muli iyo baruwa ye ya mbere yabwiye Mgr Perraudin kandi amusaba uburenganzira bwo kugira icyo abitangazaho agira ati : « Comme il s’agit d’un problème fort important, Excellence, et que je pourrai être appelé à informer les autorités compétentes, je préférais le faire sous votre couvert et peut-être ne pas paraître du tout, si vous voulez bien en disposé ainsi ». Aha rero ayo magambo arumvisha ko yasabaga Mgr Perraudin ariwe wabibwira abatetsi bakuru aliko we ntagaragare. Aliko mugitabo cye yanditsi hanyuma kitwa : « Un Abrégé de l’Histoire du Rwanda, Tome II » ahakana rwose ko ibyobavuga ko
yarazi uzasimbura Mutara III ali ibinyoma, aho nawe yarabeshye, ubanza atalibukaga ko ayo mabaruwa ye azageraho akagaragara. Muli iyo baruwa kandi yasobanuriye Résident aho umurambo (umugogo) w’Umwami uzashyigurwa akavuga ko n’imihango ijyana n’Ubwiru itagomba gukoreshwa k’Umwami wabaye umukristu. Na none tukagaruka hahandi havuga ko « Umwami abyara Umwami umwe gusa ».

 

3. Jean-Baptiste Ndahindurwa ntiyimitswe n’Abanyarwanda bose (Rubanda rwose). Yavuzwe na Rukeba n’umushefu
Alexandre Kayumba (bavuga ko akomoka mu mulyango w’Abiru). Ibyo se birahagije n’ubwo Padiri Alexis Kagame yali
abirimo aliko yanga kwigaragaza ? Kandi uriregagiza ko muli icyo gihe Rubanda batashakaga gupfukiranwa muri ubwo
buryo ngo babahe Umwami kandi ikibazo cy’Ubwami na Kalinga nicyo cyavugagwa muli « Manifeste y’Abahutu » muli 1957. Abimitse Umwami (Kigeri V) muli ubwo buryo biregangije ibyo iyo Manifeste y’Abahutu yavugaga. Bangomba kwitondera icyo kibazo cyo gusimbura Mutara III kuko ibitekerezo by’Abanyarwanda byalibitangiye guhinduka batagishaka gutegekeshwa « agahato n’ubwiru ». Bikerakana ko uwo Mwami yali uwa Batutsi gusa n’Abahutu bamwe batumvaga uko ikibazo giteye.

 

Jean-Baptiste Ndahindurwa yashyizweho n’abo bantu batatu : Padiri Kagame, Rukeba na Kayumba, aliko binyuranije n’amategeko y’Abazungu yateganya ko igihe Umwami atakiliho (apfuye cyangwa arwaye indwa ituma adashobora gukora
imilimo ye, Gouverneur Général yagombaga gutegeka uko azasimburwa. Ibyakorewe i Mwima muli icyo gihe byatunguye Gouverneur Général Jean-Paul Harroy ; abyemera kubera kwanga guhagurutsa imvururu mu gihugu.

 

Nyuma y’ukwezi J.-B. Ndahindurwa niho yakorewe icyo Abazungu bita « investiture » (« guhamya ubutegetsi »), i Kigali,
hali Gouverneur Général na Résident n’abatware bake bagize Inama Nkuru y’Igihugu. Hali hateganijwe gukora imihango yo « kwimika » (« couronnement »), ali byo kwambikwa ikamba ; ibyo ntibyabaye kubera agasigane kabaye hagati y’Abiru. Imirwano yo muli 1959 iza kuba ibyo bitabaye. Niba ugira ngo ndabeshya, uvuge igihe iyo mihango yabereye n’aho yabereye ! Ibyo mvuze uzabisanga mu gitabo cya Padiri Alexis Kagame : « Un Abrégé de l’Histoire du Rwanda, Tome II ».

 

Kuvuga rero ko Abazungu babigizemo uruhare, ibyo ni ikinyoma, kuko batigeze bamukuraho ku mugaragaro, nk’uko
bamukoreye icyo bise « investiture » ku mugaragaro. Niba uvuga ko yimitswe na Rubanda, iyo Rubanda rero ni yo
yamukuyeho ku mugaragaro muli « Kamarampaka » yo ku wa 25 Nzeli 1961. Amagambo y’abantu ni yo avuga ko
Abazungu babigizemo uruhare, maze ugerageze kutubwira urwo ruhare urwo ali rwo n’aho warusomye. Kuvuga ko
Abazungu banze uwo Mwami, ni ibitekerezo bishyizemo, kuko atali Umwami wabo. Iyo bashaka gukuraho Ubwami, baba barabishoboye igihe bakuraho Musinga, ntibilirwe bashyiraho umuhungu we Rudahigwa.

 

Iyo Kamarampaka yo yaje ite ? Umwami Kigeri V Ndahindurwa amaze kuva mu Rwanda muli Kamena 1960, ntawe
umwirukanye, byagejeje muli Mutarama 1961 ataragaruka. Kugaruka kwe byali bikomeye, kubera dossier nini yali afite yerekeranye n’ibitero yagabishije muli 1959. (Soma igitabo cyanditswe na Bwana R. Hubert (La Tout Saint rwandaise), yali umushinjacyaha w’Urukiko rwa Gisirikari (Conseil de Guerre) muli 1959 kugeza muli 1961). Kugira ngo Abazungu bamubuze kugaruka byatewe no kurinda amagara ye (sa sécurité). Bigeze ku wa 28 Mutarama 1961 Abarwanashyaka b’Abahutu
bashyiraho Republika. Ubwo ba Bazungu uvuga na ONU bavuga ko iyo Republika itemewe ; ni bwo rero bategetse ko
hagomba kubaho « Kamarampaka », kugira ngo Rubanda rwose ivuge icyo yifuza : ali Ubwami cyangwa Republika.
Icyo Rubanda yemeje rero urakizi. Uruhare uvuga rw’Abazungu ruherereye hehe ?

 

Icyo Abanyarwanda bagombaga kumenya ni uko abo Bazungu mukunda kuvuga, nta kintu Umuzungu akora kitamufitiye
inyungu. Ibyo ugomba kuba ubizi. Nta nyungu bali bafite ku gihugu cyitwa Rwanda, uretse n’uwo Mwami utari afite icyo abatwaye n’icyo abamaliye. Abo icyo gihugu gifitiye akamaro ni Abanyarwanda, akamaro k’uwo Mwami kazwi
n’Abanyarwanda (bakeya cyane). Ababiligi bamaze kuva muli Congo (1960) yaribafiteye akamaro kanini ntacyo u Rwanda
n’u Burundi byari bibamariye ahubwo u Bubiligi bwa tanze amafaranga menshi aliko bwo ntacyo rwakuyemo. Naho kuvuga
ko Ababiligi bashatse kuguma mu Rwanda no mu Burundi mubyikuremo kuko ntanyungu yaririmo. Ninayo mpamvu ntakintu bahakoze kigaragara nko muli Congo cyangwa abandi Bazungu bakoze mu bindi bihungu. Ninacyo gituma abandi Bazungu bavuye mu bihugu bakolonije hagobye kubaho intambara kubera imitungo myinshi bari bahafite, naho mu Rwanda no mu
Burundi Ababiligi babahaye Ubwigenge vuba-vuba babikiza.

 

Abanyarwanda b’icyo gihe bavangitiranije umuco w’igihugu n’amategeko y’Ababiligi yo mu gihe cya Tutelle. Gushyiraho
Umwami batabyumvikanyeho n’Abazungu bategekaga, byabaye kwiyenza. Iyo Abazungu bakulikaza amategeko yabo yo
muli 1952, baba baravuze ko batabyemeye gusa. Hajyaga kuba iki ? Abanyarwanda (Abategetsi b’icyo gihe) bali bavuze ko
niba Abazungu babyanze haba intambara. Icyo Abazungu bali bakizi. Iyo ntambara rero yajyaga guhitana byibura Abazungu
nka batatu, aliko hagapfa Abanyarwanda barenze ibihumbi bitatu. Abazungu banze iyo ntambara itagira akamaro, bahitamo kubyihorera.

 

Uwo Ndahindurwa nta kamba yambitswe nkuko ubivuga. Mujye muvugisha ukuli. Njya numva muli bamwe bali i Rwanda ngo bafite « Ubumenyi » mu byerekeye management, marketing n’ibindi kandi bizwi neza ko bahoze ali Bakarani-ngufu, babandi bacunga ibigorofana, bakaba n’Abavunjayi ndetse n’ubupolisi bakabugeramo ; hali n’abandi bavuga ko bafite Diplôme ya doctorat kandi naho hazwi bize, abo ni nkaba Tito Rutaremara n’abandi. Igihe mwivuga ntimukage mwiyita abo mutalibo.

 

Ngusabye rero kujya uvuga ibyo wiboneye n’amaso yawe, cyangwa ibyo wasomye ahantu n’undi wese yashobora gusoma.
Niba rero Abanyarwanda bake baramuhaye ilyo zina, bukeye abenshi bakalimwambura, urasanga ilyo zina l’Ubwami lyaba ligihagaraliye hehe ? Niba nabwo ali Abazungu bamushyizeho bukeye bakamukura ho, Ubwami bwe bushingiye ku yihe
ngingo ?

 

Nguhaye ibyo bita « les éléments juridiques », niba utabyumva, nta kundi nabigenza ni ukukwihorera.

 

Ndabona rero ko akenshi abantu ntibazi ibyabaye kuli icyo gihe, umwe yiha kubivuga akulikije igitekerezo cye (ses
sentiments
) cyangwa icyifuzo cye (son désir), batabanje ngo babaze ababizi uko babibonye.

 

Uramenye ntube wuvise nabi ko ndwanya Ubwami cyangwa uwo Mwami. Ndabwira abatabizi uko byagenze, ndavuga
amateka. Ahasigaye abantu bakore uko bashaka bashyigikire ibyo bazi nuwo bazi, uwumva ko ibyabaye kera ntacyo
bimubwiye n’ubureganzira bwe.

 

Igihe Rubanda nyamwishyi (le grand nombre) izongera guhitamo Ubwami, ndetse na Kigeri V Ndahindurwa bazabikore,
bizaba ali uburenganzira bwabo muli demokarasi isesuye ; aliko kandi babigira bazi neza uko ibya mbere byagenze, n’uko
uwo Mwami yifashe mu ntambara ya 1959-1960. Ejo hatazabaho izindi mpaka : bamwe ngo ntitwali tubizi, abandi ngo si twe twabikoze, bamwe bati yararenganye, abandi bati yazize ukuli… Abantu babanze bafutukirwe n’amateka y’ibyabo.

 

Icyo mbona gusa n’uko ibyo ibintu byaciye mu mucyo muli iyo Kamarampaka, na none byaca mu mucyo, hatagombye
kubaho intambara hagati y’abashaka Ubwami n’abatabushaka
, Umwami rero niba agomba kugaruka, ntagomba kuza ashorewe n’igitero cyo kumena amaraso. Ilyo mena-maraso limaze kurambirana mu Rwanda.

 

Uvuga yuko abantu bashaka guhindura amateka y’u Rwanda bakayavuga mubulyo bubashimishije nanjye nsanga ibyo ali ukuyobya abantu hanyuma bakazicuza amazi yarenze inkombe.

 

Massai-House

 

 

Israel Ntaganzwa rugamba@juno.com wrote :

 

Chers Banyarubuga,


Iyi nyandiko yo mu Museso No.102 (21-27 Ukwakira 2002) ni nziza cyane, kandi umwanditsi wayo akwiye gushimirwa ubuhanga bwe mu kwandika n'ukuntu yasuzumye iki kibazo muryo busesuye n'ukuntu azi kwandika ikinyarwanda mu buryo bushyanutse. Nkuko uyu mwanditsi atangira avuga, Kigeri ni Umwami benshi twumva kuko mu myaka 40 yose ishize bakomeje kumuduhisha bagerageza kumuharabika no kumubeshyera ibintu hano ntasubiramo. Biteye isoni kubona mu bitabo byigishwa ku mateka y'Afrika bacyandikamo ko ngo muri 1961 Abahutu bahagurutse bakivaniraho ingoma ya cyami bakayisimbuza iya republika nta ruhare na rumwe Ababirigi babigizemo. Abanyarwanda bafite ubukuru butarenga myaka 40, ubu nibo bafite majorite mu gihugu, ariko igiteye agahinda nuko aribo babyirutse babwirizwa ibyo binyoma, kandi nkuko Abanyamerika baca umugani, "IKINYOMA CYAVUZWE KENSHI GIHINDUKA UKURI!!," twese turacyemera.


Mbere na mbere ikintu cy'ingenzi Abanyarwanda bose bagomba kumenya no kuzirikana, nuko Kigeri aribo bamwiyimikiye bakamushyira ku ngoma, bakamwambika ikamba, bakamuha mandat yo gutegeka u Rwanda, kandi iyo mandat, iyo nshingano, aracyayifite kugeza uyu munsi. Haba ku bakunda Umwami cyangwase abatamukunda rero, Kigeri yarimitswe, akaba ari twe Rubanda twagombye kumwikuriraho habaye hari icyo tumunengaho, kuko ntawufite ubushobozi bwo kutwambura ubwo burenganzira. Ubwo burenganzira kandi nibwo Inkotanyi natwe twese twahagurukiye kuzitera inkunga twaharaniraga. Hari ibihugu bibiri byavanyeho ubwami mu buryo abaturage bose bahagurukiye hakaba ntaho bihuriye n'amahano y'ukuntu Kigeri bamuvanye ku ngoma mu Rwanda. Ibyo bihugu ni u Burusi bwategekwaga na Czar/Tsar Nicholas II na Iran yategekwaga na Shah Reza Pehlavi. Abo bami bombi bategetse ibihugu byabo nabi barabyangiza, ingoma zabo zihangurwa n'abaturage ubwabo ntawuvuye hanze ngo abibakoreshe, ubwami buhashira butyo. Ingoma ya Kigeri mu Rwanda rero nta kuntu twayigereranya n'izo zombi,kuko yavanyweho n'Ababirigi b'abanzi bacu bari bakolonije igihugu cyacu bagitegekesha ikiboko n'imbunda.


Hari abagira bati ibihe tugezemo ntabwo bigendanye n'ubwami, bavuga ko ari "demode." Abatekereza batyo bisa naho birengagiza amateka y'isi bakayoberwa ko hariho ibihugu biteye imbere cyane biyobowe n'abami. N'abo Babirigi bavanyeho Umwami wacu bagumishaho uwabo. Niba ubwami bwari bubi kuki batabanje ngo bavaneho Umwami wabo?? Muri ibibihugu nkuko bigaragara, bafite amahoro, amajyambere, ubukungu, stabilite, uburenganzira bw'ibiremwa muntu,ugasanga mu byukuri ibitegekwa na ba presidents ntacyo bitandukaniyeho n'ibitegekwa n'abami.


Hari ingero ebyiri uyu mwanditsi yatanze ku bami ba Afghanistani na Bulgariya agerageza kubigereranya n'ibyo mu Rwanda.Kuva mw'ijana rya 18 habayeho kugerageza gufatanya Afghanistan ngo ibe ishyanga rimwe riyobowe n'umutegetsi umwe, ariko igihe cyose bimikaga ingoma ntiyamaraga kabiri. N'Abongereza bari barigize ishyano, bagerageje kuhakoloniza ariko ntibahamaze kabiri.Ibyo rero ahanini ikibitera nuko icyo gihugu gituwe n'amahanga arenze 20 atagira ikintu na kimwe ahuriyeho,arimo Abashinwa bo muri Mongoliya, abandi bo mu bice byo hepfo y'u Burusiya, Abanyairaki, Abarabu n'andi menshi,akaba rero adashobora kuyoboka umutegetsi umwe. N'uriya President uriho ubu washyizwe ku ngoma n'Abanyamerika, ari nabo bamurarira ijoro n'amanywa, nibahava ntazamara kabiri, kuko icyo abaturage baho bashaka ari nka confederation, yahesha buri bwoko autonomie yuzuye. Uwo Mwami rero nawe wigeze gutegeka Afghanistan, ntiyigeze yemerwa birushije abandi bagerageje gutegeka icyo gihugu, bikaba ari nayo mhamvu ubu adashobora kwemerwa ngo yongere asubire ku ngoma.


Muri Bulgariya ho icyo twavuga hano nuko icyo gihugu cyimitse ingoma ya gikomunisti (bitewe n'Abarusi bari bahateye bakavanaho ingoma yariho muri 1956), kubera rero ko abakomunisti baharaniye cyane kuzamura Rubanda rugufi kandi koko baruvanye habi, ababyirutse nyuma y'iyo myaka babaye abakomunisti bakabije (fanatiques/extremistes n'ubu kandi mu bihugu bimwe byo mu Buraya bw'i Burasirazuba ishyaka rya gikomunisti riracyafite majorite), ubwami buribagirana burundu. Ubu rero kugirango Umwami wa Bulgariya agaruke mu gihugu abaturage bamutorere kubayobora,nuko bamukundaga kandi bamushimiye ubushobozi bwe kandi byabahaye uburenganzira bwabo bwo gushyiraho umutegetsi bishakiye.


Mui bibazo bimwe uyu mwanditsi yanditse byabajijwe n'abadakunda Umwami, ngo bashaka kumenya imhamvu Abami b'u Rwanda batumvikanye n'Ababirigi kugirango mu gihugu habe amahoro. Abavuga batyo barigiza nkana gusa cyangwase ntabwo bazi amateka n'amatwara ya gikoloni. Nta kuntu Abami bacu bari kumvikana n'Abakoloni kuko mu bihugu byose byakolonijwe ntaho byabaye, ahari uretse Kayibanda gusa kandi dore aho yasize uRwanda. Abazungu bari baje gukoloniza ibihugu bibwiraga ko bazabitegeka iteka ryose, bakaba rero batari kwihanganira umurwanashyaka uwo ariwe wese wageragezaga kubohoza igihugu cye abavana amata mu kanwa.Kuvuga ngo abakolonijwe bazumvikane n'ababakolonije byari nko kuvuga ngo imbeba n'injangwe bazunvikane! Ababirigi mu Rwanda rero bari bazi neza ko batigeze bemerwa na Musinga, Rudahihgwa na Kigeri, bakavuga ndetse ko hariho amadossiers yabo agifungiye mu Bubirigi (classified), u Rwanda rwari rukwiye gusaba agashyirwa ahagaragara nkuko aya Lumumba bayafunguye, rubanda tukamenya aho ukuri guherereye.


Ikindi kibazo bamwe babajije ni uko ngo Kigeri atafashije abafashe intwaro zo kubohoza igihugu cye,bakabona ko yatereranye ingabo ze. Mu butumwa Kigeri yanyujije kuri za radio no mu matangazo na za interviews yatanze, yavuze ko atigeze agambirira gusubira ku ngoma akoresheje intambara. U Rwanda ni urugo rw'Umwami kandi Abanyarwanda ni abana be, Kigeri akaba rero yaranze kujya kwisenyera no kwica abana be, nubwo bamwe babaye ibigoryi bakica abavandimwe babo abandi bakabaheza ishyanga. Abo bana bavukiye mu buhunzi babonye ko nta kundi bazasubira iwabo niko gufata za Kamaramhaka uRwanda bararubohoza, bararutaha kandi Kigeri ntiyari kubatangira.


Nkurikije inyandiko nyinshi mbona zivuga ku bakunda Umwami cyangwase abatamushaka, bigaragara ko umugabane munini mu batamushaka babiterwa nuko batamuzi. Kigeri amaze imyaka irenga 40 avuye mu Rwanda,bikavuga rero ko abatararenza iyo myaka uretse bacye bahungiye i Bugande no muri Kenya, abandi Kigeri ni ukumwumva gusa, bamubwirwa n'ingoma za Kayibanda na Habyarimana na za media zibeshya, cyangwase ku byo bumvaga mu Banyarwanda bihaye kwanga Kigeri kubera imhamvu n'inyungu zabo bwite.Muri abo bose bashutswe batyo nanjye nari mbarimo kugeza umunsi umwe nahuriye na Kigeri i Nairobi muri 1990. Ubwo nari mu ruzinduko i Bugande, ngarutse mara iminsi mike iNairobi nuko nyarukira kuri UNHCR kureba uko imhunzi zacu zari zifashwe, ninjiye mu biro by'umwe mu bakuru baho, nkicara Kigeri aba atungutse mu muryango, mbonye ukuntu bamwakira nka Chef d'etat ndumirwa. Ubwo naramutegereje asohoste turaramukanya, tuvanayo tumarana nk'iminota 20,mhava anyemeje mu buryo buhagije ko ibyo nari naramwumviseho byose byari amahomvu gusa nta shingiro na rimwe byari bifite.


Ku bwanjye ku giti cyanjye bamwe bajya bambaza bati umuntu nka Ntaganzwa w'umuprogressiste,gauchiste,umuhakanyi,umwemera bike,abandi bakananyita umukomunisti nubwo ntigeze ninjira mw'ishyaka rya gikomunisti, ashobora ate gushyigikira ingoma ya cyami mu Rwanda?? Imhamvu ebyiri z'ingezi zishyigikira Umwami Kigeri cyangwase ubwami mu Rwanda,nuko kimwe n'ibindi bihugu bitegekwa cyangwase byahanzwe n'abami, ubwami bwabaye kandi buranga umuco karande/gakondo y'igihugu,kandi natwe mu Rwanda Umwami niwe uhagarikiye/representant/symbole y'umuco (heritage?) wacu wa Kinyarwanda. Ikindi nuko Kigeri yavanyweho n'ababeberu bari bakolonije igihugu cyacu, ubu rero baraneshejwe,gusubiza Umwami ku ngoma bikazaba intambwe (stage/level) cyangwase urwego ruheruka mu kubohoza uRwanda rwacu burundu.


Kuva muri 1994 aho intambara yarangiriye,hakomeje gusabwa ko hajyaho commission yiga ikibazo cy'Umwami Kigeri ngo isuzume ibibazo biriho byamubuza cyangwase byamwemerera gusubira ku ngoma.Kugeza ubu rero iyo commission ntiyigeze ijyaho, kuko uko bigaragara nta bibazo byagaragaye byakwigwa n'iyo commission,igisigaye gusa kikaba gutegura igihe n'uburyo Kigeri azasubira ku ngoma y'uRwanda.


Mugire Umwami.

Ntaganzwa
New York, 9 April 2003