Ni nde wemerewe kunyereza umutungo w’igihugu?

Umugabo Pasiteri Bizimungu uri no mu b’imena dukesha iki gihugu nyuma ya 1994, Imana imuhe amahoro n’imigisha myinshi, bamureze kuba umucuruzi kandi ari Perezida. Na we mu gusubiza inama ya FPR yari aregewe, ati “ erega ahubwo byaba byiza twumvikanye ku rutonde rw’ibyo twemerewe gucuruza n’ibyo tubujijwe. None se ari ugucuruza lisansi ari no gucuruza amata, byose si ubucuruzi?” Ubwo yibutsaga umwungirije Paul Kagame ko afite ikaragiro ry’amata akoreshamo  abasirikari bahembwa n’igihugu.

Uru rugero duhereyeho  si ikindi rugamije, ruributsa bimwe mu bivugwa muri iyi minsi byo kurwanya Korabusheni (corruption) byadutse, bakaba byaradukiriye n’abo benshi tutatekerezaga ko byageraho. Umugabo Yakobo Bihozagara uvuye muri ambassade y’u Rwanda i Paris akaba mu baregwa ba mbere. Amafaranga aregwa kunyereza ntagira ingano, ni nk’ibyaha bya shitani. Nyamara ariko, nta kivugwa ku byo yanyereje muri minisiteri ya Réhabilitation yayoboye mu ikubitiro, nta kivugwa ku byo yanyereje muri minisiteri y”urubyiruko, nta kivugwa ku byo yanyereje muri ambassade y’u Rwanda mu Bubiligi yabanjemo mbere yo kujya i Paris. Byongeye, ntibanatubwira ibyo yasigiwe na Rutabayiru na Karusisi yasimbuye i Parisi, ngo tugereranye twumve niba koko yaribye kariya kayabo.

Bamwe bacyumva ko Bihozagara arezwe mu cyama, barishimye, kuko mu buzima bwe, Yakobo Bihozagara nta kintu yakoze ngo nibura abantu nibatanamukunda, bareke nibura kumwanga. Yatoteje impunzi mu Bubiligi no mu Bufaransa, yahemukiye abo yajyiye asimburanwa na bo mu mirimo, ashora igihugu mu manza zitagira ingano kandi zose arazitsindwa kugeza ku rw’indege ya Habyarimana yaburanye na Onana umunya Cameroun, atsindwa urw’ubwicanyi bw’i Kibeho atsinzwe n’umugore uhakana génocide witwa Marie Roger Biloa na we w’umunyamakuru. Yareze n’ikinyamakru le soir banga kurwakira.  Iyo yagiraga icyo atangariza amaradiyo, yaranduranyaga buri gihe. Ati Mushayidi ni umujura  naceceke, kandi  nta perereza yigeze akora uretse propaganda gusa. Benshi bamwitaga Bihuzagurika. Nagende uyu musaza yaranduranije, uretse ko nta wagira uko undi agize.  Bihozagara yari ateye ikibazo gikomeye kurusha ibyo yakemuraga, ingorane asizemo FPR ndetse na leta zizagora kuzikemura. Iyo rero aba uhanwa, yajyaga kuba yarahanwe kare kose.

Undi bavuga ni Pascal Ngoga.....

Havuzwe na Rudasingwa Théogène, ......

Habayeho na Sam Nkusi  ndetse na Gahima Geraridi mukuru wa Rudasingwa Théogène dore ko bonse rimwe muri byose.

Nyamara umwera uturutse i bukuru

Hari benshi bibaza aho Bihozagara, Umutoni Christine, Ngirabanzi  Lauriayani na Gasana Anastase bahuriye. Bose bavunnye imiheha bongerwa indi, kandi barindwa ubutabera inteko ibakubise intahe mu gahanga. Tugarutse kuri NGIRABANZI kuko ari we ukinari mu myanya, nta wakwibagirwa umushinga w’amashanyarazi, yayobeje akayajyana kumurikira inka za   afandi PC, mu gihe mu mashuri amwe n’amwe bacanaga udutadowa. Ni cyo cyatumye Afandi PC yaramukujije, yaregwa mu nteko akamurambararaho. Yakubita abapolisi b’abadage yasinze, bakamutumaho bakamushumbusha OCIR. Ubwo se uwo utwara amashanyarazi abaturage akamurikira inka, ni we utarebwa na Korabusheni?

Tugaruke se kuri iriya ndege perezida agendamo, ye bwite nyamara akayikodesha leta ku mafaranga atabarika nk’aho leta yari inaniwe kwigurira iyayo? Ubwo se si ugusahura leta niba atari na korabusheni? Ubwo se  na byo byanyuze muri tender board cyangwa umuvunyi arabizi? None se, ari ukureka depite agasana inteko agahemberwa ibyo yapiganiwe, akabitsindira akabikora, ari no  guhatira leta gukodesha ku ngufu z’umwanya urimo indege ihenze kuriya, uri korabuti ni nde? Kuki se Bizimungu mu gihe cyose yabaye perezida, yahitagamo gukodesha indege ya Ngarambe Charles, yahagararaga ahantu henshi ariko idahenda igihugu, akaregwa korabusheni ngo kuko yaguze inzu n’abafaransa? Ubu se twirirwe tuvuga ko ambasade y’u Rwanda mu Bwongeleza ikodesha inzu ya afandi PC yaguzeyo? Ubwo se ibyo byanyuze muri tender board? Biteye isoni rero kubona abantru bahanwa n’abagombye guhanwa mbere yabo, bagatinyirwa igitsure. Nta wabuza umuntu Paul Kagame gushaka icyamutungira abana mu minsi iri imbere. Ariko nka perezida, nabuza imodoka zihenze, ajye yiheraho, arebe n’indege agendamo kandi ye bwite akodesha leta.

Aba bakurikiranwa se bazabe bazira iki?

Uwabigarukaho, yavanga amakuru n’ibivugwa. Ikibazo cya Ngoga cyo kirumvikana rwose. Ntiwaba uzi ubucuti bwa Ngoga na Mazimhaka Patrick ngo utungurwe n’uko ari we bahereyeho. Abibuka ubwo Bizimungu yeguraga, bibuka ko Kagame yakoranije abasirikari bakuru akababaza uwo babona waba perezida. Ku buryo butunguranye, abasirikare bavuzemo Wilson Rutayisire, ariko bavugamo na Patrick Mazimhaka. Abo bombi bakoranye na Bizimungu mu ishyamba, akiri commissaire wa information wa FPR. Majoro Rutayisire bamwe bibuka ibyo yaje gukorerwa na major Kakira Rwakabi wa DMI, amurasa urufaya  bikitwa kwiyahura. Mazimhaka we baramuciye mu kinyabupfura, na we araborohera dore ko yanga amatiku n’induru. Muri iyi minsi ariko, yarezwe kuba ngo yasuraga Karemera kenshi muri Afrika y’epfo, aho n’umuryango wa Kayumba  Nyamwasa uri muri iki gihe. Bamwe mu bashinzwe guteranya abandi, ibyo babyise ubugambanyi, ngo gusura umuvandimwe ni ukugambana. Uburyo rero bwo kurushaho guca Mazimhaka intege mu byo akekerwa ubusa, harimo gukura Karemera muri Africa y’epfo, gucira Kayumba mu Buhinde ukanamukura burundu mu gisisirkari atagishijwe inama, ariko ukanavundaguza Ngoga kuko  bamufata nk’uwagira akamaro muri diplomatie. Nuko araregwa itangazamakuru ry’abamurega riba irya mber mu kubitswa iryo banga. Bihozagara ni we wabivuze ukuri, ati muri ambassades zose ni ko bigenda. Ibyabye Adis Abeba, wasanga bidatandukanye cyane n’ibyabaye ahandi, ariko Ngoga  yagize umutwe munini.

Bihozagara mu mafuti yisanganiwe, agaragara nk’urangaje imbere abavuye i Burundi. Uburyo rero bwiza bwo kubacecekesha, bwabaye gukura Murigande muri Secretariat ya FPR ukamusimbuza intama y’Imana Ngarambe François, ukamujyana muri MINAFET aho agabana imirimo na Mitari na Sezibera, ugakura Kabandana Mariko muri MVK, akaba mu gashomeri ukageraho ukamwohereza kwiga, ukamukoza muri Rwandatel  ubundi ukamuha gutwara ishule. Ibyo byose ukabikora warishe Majoro Birasa, Sekamana waramwoherje “kwiga “. Icyo gihe rero, uwashobora gutera hejuru ni Bihozagara, ugomba kumuziba umunwa kandi we biroroshye kuko aho yasheshe hose yahataye ibaba, ntazi guteganyiriza iminsi. Naho ba Mutoni n’abandi bo, bagenda bagwa mu mporero, bazajya babatuma ahabonetse.

Muri make rero, kurwanya korabusheni kuri buriya buryo ni ikinamico, kuko uwakubitira imbwa gusutama, yazimara. 

Gatashya Jean de Dieu i Buruseli  na Oreste Bikundiye i Kigali
Journal Rwanda l'espoir Umwezi n° 13