U RWANDA MU MAHINA (1)

Dore bimwe mu byo Prezida General Paul Kagame yavugiye I Bwisige muri Byumba tariki 31 Werurwe 2003 aho  yari yagiye kwizihiriza umunsi mhuzamahanga w'amazi. Umuntu wese ashobora kwisesengulira akiyumvira neza icyo ashaka kuvuga n'icyo agamije kugeraho. Ibyo aribyo byose si ibintu by'i Rwanda. Si Ubumwe n'Ubwiyunge mu Banyarwanda.
Prezida Paul Kagame aragira ati:
- "abatemera ibyo niyemeje gukora, boshye bayobewe ko ibyo mvuze byose mbikora, nkuko navuze ngo nzacyura impunzi nkazicyura, nti nzagarura amahoro, nkayagarura, abo batabyemera cyangwa se batarabyumva bazabyumva maze kubakomeretsa";
- "abavuga ngo bejeje amasaka n'ibigori, njyewe mbabwiye ko twe dufite insyo, tuzasya ibyo bigori n'ayo masaka";
- "ibizava mu matora ari imbere njye ndabizi ijana ku ijana, hazavamo ibyo njyewe nshaka ko bivamo, kandi bijyanye n'ibyo Guverinoma ishaka gusa";
- "abari hanze birirwa babwejagura, ntakindi kizaba kibazanye, ni ukwigisha amacakubiri, kandi nabo nzabakomeretsa";
- "abahunga Igihugu bagenda bububa tubareba, tukabareka bakagenda, hari n'abandi bakiziritswe n'imyanya barimo muri Goverinoma, ngiye kuyibambura, nabo mborohereze guhunga"; n'ibindi bikarishye nk'ibi mumaze kwisomera.

Ayo ni amagambo y'umukuru w'igihugu!
Hejuru yiyo disikuru ibindi bishya ni uko muri raporo ya Komisiyo, hari aho bagira bati (cfr I paji ya 32):

"Nyuma yo kuvugana n'abantu banyuranye ari abo mu Ntara n'Umujyi wa Kigali, dukurikije na raporo twashyikirijwe n'inzego z'umutekano, byatugaragariye ko hari agatsiko (groupe) k'abantu bagenda bakoresha inama hirya no hino mu Gihugu (mu Ntara n'umujyi wa Kigali), baba bagamije kwigisha inyigisho z'amacakubiri zijyanye n'ingengabitecyerezo ya PARMEHUTU. Intego yabo y'ibanze ni iyo kuzatsinda amatora bakoresheje iyo turufu ya rubanda nyamwinshi (abahutu). Stratégie ngo bakoresha (cfr ibikubiye mu ibaruwa ya Hon. Mpayimana)".

Haherewe kuri iyo disikuri no kuri ibi, wongeyeho nibyo bavuga muri raporo ngo mu Rwanda bazatora nkuko abarundi batoye Ndadaye, usanga ibi bibazo byose MDR na Kabanda n'abo bafatanije bari guhura nabyo bishingiye ku bwoba FPR ifite bwo guhiganwa mu matora aciye mu mucyo n'abayoboke b'Ishyaka MDR;
Bityo bakaba barafashe ingamba zo gusenya MDR no gusya no gukomeretsa abayobozi bayo mbere y'uko amatora aba.
Kubera ko implosion yananiranye kuva kera cyane cyane kuva aho Rwigema ahungiye, icyo gihe bakoresheje Gasana, Safari, Ntiruhungwa n'abandi binjizwa mu Cyama ku ngufu birabananira. None ubu babonye igihe kibacikanye, barasanga nta kundi byagenda, mbese basanga ari ngombwa gukoresha Inteko Ishinga Amategeko ubusanzwe idafite aho ihuliye n'amashyaka ya politiki. Umuntu yakwibaza aho inshingano z'Inteko zihuliye no gukontorora imikorere y'amashyaka.

Umuntu yakwibaza niba ibyakozwe muri 1959 bifite Guverinoma yabibazwa ubungubu?

Abagize iyo Komisiyo yashyizweho n'Inteko bose ko ari abava mu mashyaka agomba kuzahiganwa na MDR, umuntu yakwibaza ukuntu urwo rubanza MDR yacirwa n'abacyeba rwo murumva rwaba rwubahiliza ayahe mategeko, rwaba rumeze gute usibye kuyihamya ibishyito byo kuyirimbura?
Biratangaje kumva ko Komisiyo ivuga ko yashingiye kubyatanzwe n'inzego z'umutekano,umuntu akibaza kuva ryari izo nzego ziha raporo abadepite, cyane cyane iyo izo raporo zitigeze zimenyeshwa Minisitiri w'Intebe na Goverinoma?
Ese niba bari basanzwe bazi abigisha amacakubiri, ibihembo babaha ni ukubaha imyanya mu Nteko no muri Goverinoma cyane cyane ko Itegeko Nshingiro risobanura neza ko ntawe ushobora kujya muri iyo myanya inzego z'iperereza zitamukozeho ubushakashatsi ngo zicukumbure imyitwalire ye mu bihe by'intambara na nyuma y'aho. Imikorere y'Inkotanyi iratuyobeye, igihugu gikwiye gutabarwa naho ubundi turashize.
Birababaje kubona bagereka ibyaha n'amakosa ku Bantu ntibanabibamenyeshe kare kugira ngo bisobanure kandi batange ibimenyetso byerekana ko ari ibihimbano? Baziregura se ari uko Inteko imaze gufata imyanzuro yo gubahamya ibyaha no kubasabira ibihano?

Dore Abantu Babeshyerwa ngo bari mu Gatsiko ngo kigisha Amacakubiri:
Yemwe harimo abahutu bose batemeye kujya muri FPR abasivili n'abasirikari.

Abari ku isonga:

1. Kabanda Célestin ;
2. Gakwandi Pierre ;
3. Nyandwi Tharcice ;
4. Kavutse Léonard ;
5. Ahorukomeye Léonard ;
6. Bizimana Aloys ;
7. Rutihunza Théobald ;
8. Minani Faustin ;
9. Hon. Hatungimana Callixte ;
10. Hon. Hitimana Léonard;
11. Rugira Amandin;
12. Ambassaderi Bonesha Joseph;
13. Hategekimana Antoine;
14. Gatwabuyenge Vincent.

Abavugwa batagaragara mu nama kenshi:
1. Munyanshongore Eustache;
2. Karara (Primature) ;
3. Sebudanga Augustin ;
4. Ngendahimana Gérard ;
5. Hon. Murekatete Jeanne d'Arc ;
6. Rutagungira Médard ;
7. Ndayishimye Bernardin ;
8. Munyarukiko Jdamascène ;
9. Benda Lema François ;
10. Serubibi Soter ;
11. Sibomana ;
12. Habimana Joseph ;
13. Karengera J.M.V. ;
14. Munyarugerero Victor.

Abandi bakorana inama batari muri MDR:
1. Général de Brigade BEM Habyarimana Emmanuel ;
2. Hon. Colonel Ndengeyinka Balthazar;
3. Major Maniraguha Jacques;
4. Minisitiri Mugorewera Drocella ;
5. Nkurunziza Damascène

Ab'Icyangugu ngo bari mu ishyirahamwe ubumwe bw'abahutu :
1. Pasteur Ntambabaro André ;
2. Rugira Amandin ;
3. Gatwabuyenge Vincent ;
4. Sevumba Innocent ;
5. Mukwiye Gérard

Abatera inkunga ibyo bikorwa by'i Cyangugu baba mu Rwanda :
1. Pasteur Bihoyiki ;
2. Munyambibi ;
3. Uwankubito Alphonse ;
4. Nkinzingabo Patrick ;
5. Ayirwanda Jean Baptiste

Abatera inkunga ibyo bikorwa by'i Cyangugu baba mu mahanga:
1. Sezibera Célestin ukomoka mu Cyimbogo;
2. Remesha Siméon (wahoze ari directeur wa Groupe Scolaire ya Gihundwe) ;
3. Gatamobwa Etienne ;
4. Ntakonayigize Emile ;
5. Dr. Kanyamupira Jean Baptiste.

Ibirego by'umwihariko kuri Celestin Kabanda :
Kuba umusigiri wa Rwigema kandi bikaba bizwi ko bakaba bakiri kumwe;
Kuba ashyikirana rwihishwa n'abo yasimbuye barimo Rwigema na Twagiramungu ushaka ko MDR imwamamaza mu matora ;
Kuba yarafatanije na Pasiteur Bizimungu gutegura statut za PDR Ubuyanja ;
Gukoresha inama rwihishwa mu ma hoteli, mu rugo iwe no mu ngo agendamo ngo zikwirakwize amacakubili ;
Gushinga amashyirahamwe ngo yabahoze ari aba JDR nk'ITARA muri MVK, mu Birambo, muri Masango n'ahandi ;
Gukwirakwiza inyandiko zisebya igihugu mu binyamakuru no kuri internet ;
Kuba yarashyizeho website ya MDR ngo isebya igihugu, n'ibindi.