Ibaruwa Habyarimana Yuvenali yandikiye Kagame Pawulo muri 1994

 

 

 

Kwa Data wa twese, tariki ya 30/07/1994

 

 

Nyakubahwa Kagame Pawulo,

 

Ni byo koko, waratsinze ugabana u Rwanda. Ariko se uzashobora no kuruyobora ? Sinabihamya. Mu by’ukuri nifuza ko byakunanira. Ariko na none kubera ukuntu abanyarwanda batesetse bikabije, reka nkugire inama zagombye kugufasha kubategeka neza no kuyobora igihugu kugira ngo kitazongera kikagwa mu mahano.

 

Nkuko ubizi neza, abanyarwanda banyitaga UMUBYEYI. Kandi koko nari we. Ibyo ari byo byose nta ko ntagize. Yego abatutsi ntibari bafashwe neza cyane ndetse n’abanyanduga nabanje kubakanda. Ariko kandi nashyiraga mu gaciro nkageraho na bo nkabibuka. Niba ugira ngo ndabeshya uzibarize ba Kajeguhakwa, Rwigara, Makuza, Majyambere, Rubangura, Katabarwa n’abandi ntarondoye, bazakubwira ukuntu nari umuntu mwiza.

 

Ku kibazo cy’impunzi z’abatutsi rwose sinitwaye neza. Ariko kandi ndahamya ko iyo Fred Rwigema ataza gupfa urw’amarabira tuba twarashyize tukumvikana. Gusa rero burya ngo inzira ntibwira umugenzi kandi uko byagenze ibara umupfu.

 

Icyakora biriya byo kwigira nyoni nyinshi ukabeshya abanyarwanda n’amahanga ngo Bizimungu ni we Perezida, bizakugaruka nta kabuza. Wa mugani wa Nsekarije, burya abanyarwanda bose bazi ubwenge. Buriya barakureba kandi abenshi ni abaguteze iminsi. Cyane cyane uritondere abo wita abatoni bawe. Nizeye ko Lizinde na Kanyarengwe bakubwiye ibyanjye na bo.

 

Abandi ukwiye kwitondera ni abahutu muri rusange. Ntuzatwarwe n’umujinya ngo ushake kwihimura. Aho uzi indishyi napfanye ku mutima kubera abanya Gitarama naritaguye muri 1973 maze gukora coup d’Etat ngakuraho Kayibanda ?

 

Ariko mbere na mbere uritondere abatutsi barokotse. Bazabanza bagufate nk’UMUKIZA wabo kubera kutamenya. Propagande yawe buriya iracyabahumye amaso kandi ni mu gihe. Ngo umutima usobetse amaganya ntusobanura amagambo. Ariko umunsi bamenye ukuri kose, ndakurahiye ntuzabakira. Umunsi bavumbuye ko wagize uruhare rukomeye mu ishyano ryabagwiriye igihe wafataga icyemezo cyo kunkocora mvuye i Dar es salam, indege yanjye ukayishwanyuriza mu kirere hejuru ya Kanombe maze igisuguri cyanjye kikagwa mu rugo ahahoze ari iwanjye, nkubwije ukuri, icyo gihe uzatangire uzinge utwangushye, kuko iminsi yawe izaba ibaze.

 

Uramenye kandi ntuzishinge abanyamerika nk’uko niringiye abafaransa bakantamaza. Ubu baracyagukeneye. Bazagukoresha bigarurire Zaïre ndetse n’akarere kose k’ibiyaga bigari. Bazakogeza cyane bakugire igitangaza muri Afrika ariko ntibazatinda kuguhararukwa bakakwipakurura izuba riva ukumirwa. Uramenye ntuzakomeze kwibasira ba rutuku nabonye abafaransa bo ubogeraho uburimiro. Burya abazungu bose ni bamwe, ntuzatinda kubimenya.

 

Undi mugabo rero ugomba kwitondera ni Museveni kuko utarebye neza ni we waguhitana dore ko mu by’ukuri ari we ukesha icyo cyubahiro. Uramenye rwose utazaba nka wa wundi utazi ikimuhatse.

 

Mu gusoza uru rwandiko rero, ndashaka kukubwira ko abanyarwanda batoroshye. Barandirimbye biratinda. Bankorera animasiyo biraryoha, ariko umunsi wo kumpagurukana wabaye umwe gusa. Ntuzishinge iceceka ryabo, burya baba bategura kuzaguhirika. Umunsi watangiye kubona za taragiti mu mugi, ukumva bahwihwisa imyigaragambyo, ingabo zawe zigatangira kukwigarika, uzitegure gukuramo akawe karenge.

 

Kuko ntakubeshye benshi bangiriye inama zo gufungura amarembo ya demokarasi hakiri kare. Ndetse burya na mbere y’intambara y’ukwakira, hari abansabye kureka impunzi z’abatutsi zigataha ndetse tugasangira n’ubutegetsi. Ariko bose nabimye amatwi, mpitamo kwiyumva jyenyine. Uramenye rero ejo utazapfa urwo napfuye.

 

Uwawe n’ubwo wamwivuganye,

 

Habyarimana Yuvenali.